பூமித்தாய்

பூமித்தாய்


இறைவன் அம்பரத்தில் விட்ட பம்பரம்
வராக மூர்த்தியின் முயற்சி
வந்தது உன் சுழற்சி
யுகங்களாய் சுற்றினாலும் ஏற்படவில்லை அயர்ச்சி

மணிக்கு ஆயிரம் மைல் வேகம்
தெரிகிறது உன் இளமையின் மோகம்

சூரிய குடும்பத்தின் மூன்றாவது குழந்தை
நீர் இருக்கும் ஒரே இடம்
இது ஜீவராசிகளின் பிறப்பிடம்
பிறப்பு இறப்பு நடக்கும் ராட்சத தொழிற்சாலை

முன் பாதி வெளிச்சம்
பின் பாதி இருட்டு
கூச்சமாக இருப்பதினாலோ
உன்னை நீ பாதி மூடிக்கொண்டு இருக்கிறாய்

வான வெளியில் நீலப் பந்து
பால் வெளியில் வீதி உலா
உன்னை சுற்றித் திரியும் வெண் நிலா

கொண்டிருப்பது 70 சதவிகித ஜலம்
அதிலே நீ காட்டுகிறாய் உன் மாயா ஜாலம்

நீ திரும்பிப் படுத்தால் நிலநடுக்கம்
பெருமூச்சு விட்டால் சூறாவளி
கொந்தளித்தால் புயல்
கோபப்பட்டால் எரிமலை
சோம்பல் முறித்தால் சுனாமி
நீ அமைதியாக இருக்க என்ன கேட்கிறாய் ?


வட துருவம் தென் துருவம்
காண்கிறோம் உன் பனிப் பருவம்
நதியின் ஓட்டம் உனது ரத்த நாளம்
கால மாற்றம் நீ போடும் தாளம்


மலையை உடைத்து சிமெண்ட் செய்கிறோம்
பூமியை பிளந்து தங்கம் எடுக்கிறோம்
நிலக்கரியையும் பிற கனிமங்களையும் விட்டுவைக்க வில்லை நாங்கள்

நீ எங்களுக்கு இடுகிறாய் அன்னம்
பதிலுக்கு ஆக்குகிறோம் உன்னை சின்னாபின்னம்


அதிகரிக்கும் உன்னுடைய வெப்ப நிலை
மனிதன் வெட்கித் தலை குனியும் நிலை
ஒசோனிலே இருக்கும் ஓட்டை
விளக்குகிறது அவனது பேராசை என்னும் நிலை கேட்டை


நான் நிற்காமல் ஓட
ஓ மனிதா
கொஞ்சம் நின்று யோசிப்பாயா?


ஆ. வா. தேவன்
சென்னை

தார் சாலை பணியாளர்கள்

சாலைகளில் விரைந்து செல்வோரே
சிறிது நில்லுங்கள்

நீங்கள் சொகுசாய் பயணிக்க
எங்கள் வாழ்கை பயணத்தை தொலைத்தவர்கள் நாங்கள்
ரோலர் வண்டியின் முன் கிளம்பும் தூசி
சீமற்றால் கூட்டுவதால் அல்ல
நாங்கள் விடும் பெருமூச்சினால் தான்

சாலைகளில் விரைந்து செல்வோரே
சிறிது கவனியுங்கள்

தினக்கூலி வாங்கும் நாங்கள்
Increment, Bonus பற்றி கவலை கொள்வதில்லை
கொளுத்தும் வெயிலில் பணிபுரியும் நாங்கள்
Power-Cut பற்றி புலம்புவதில்லை

சாலைகளில் விரைந்து செல்வோரே
சிறிது சிந்தியுங்கள்

கிடைப்பதை உண்டு வாழும் எங்களுக்கு
பள்ளிக்கு செல்லாத எங்கள் குழந்தைகளின்
எதிர்காலம் பற்றி நாங்கள் யோசிக்கவே நேரம் இல்லை

சாலைகளில் விரைந்து செல்வோரே
சிறிது உதவுவீரா